January 29, 2009

Maw ka nunnak Bawipa cu thangtthat tuah, Maw ka sining vialte Bawipa cu thangtthat tuah. (Psalm 103)

Ulenau hna,

Pathian sin i arami khuaruahhar kong hi kan ttial lengmang i ttial cawk zong asi ti lo. Pathian nih hin minung kan lungthin hi arak kan hmuh dih taktak i hica kan ttial mi he pehtlai in zuumtu hrimhrim hna zong nih kan rian kan rak ttuan hna lo. Bible caang akan peekmi kan rel thlu lo, a sullam kan thei lo, theih sawhsawh vial tiang hrawng lawng kan iza hna. Cu caah hi kong he pehtlai in Bawipa nih amah pumpak in arak chimmi hi ngai hmanh cang hna usih.

Ahmasa ah Bawipa ti hi kan hman lai. Zeicaah ti ah Zahan zaan ah hi khuaruahhar adongtu inchungkhar le an hawile cheukhat sin ah arak ilangh tthan i thil sining vialte afianter dih cang. Pakhat nih God ti in a address atuah tik ah, “keimah hi God, ka si lo, kei cu Jesus ka si” ati. “God ti in nan ka auh ding asi lo” ati hna. Cun “atu cu Language pahnih ka hman lai, pakhat cu Mirang holh asi lai i pakhat cu Falam holh asi lai” ati i holh pahnih hmang in bia tampi aruah hna i an thinlung chung i aum mi bia vialte hal dih ding in caan ttha le caan sunglawi a peek hna.

Miracle kong he pehtlai in “hi kong hi nan mah hrimhrim nih ca-uk in nan ttial lai i, cu cauk cu Part One, Part Two, Part Three ti in nan tthen lai, Akarlak ah “ continue” ti in nan pehter hna lai, hihnu zarhhnih chung caan kan peek hna i hichung ah nan lim hrimhrim lai” ti ah a ti hna.

“Cun atu i kan chimh mi bia hna hi nan hmuh sawhsawh nan rel hna lo, nan thei taktak lo, cu caah hi hi zeidah asi timi kan chimh dih hna lai, tuhnu zaan thum chung, zarhte ni tiang kan um pi hna lai i hi chung ah nan duhmi bia poh rak ka hal uh, midang zong sawm hna uh, kan chimh dih hna lai” ti ah ati hna.

“Caan zong hi anai tuk cang, atu cu vulei cung khuazakip ah aherhning in rian ttuan nan hau cang, akenkip in an in auh hna lai i an in auh hna nak poh ah nan kal lai, pengdang le ramdang tiang in nan kal a hau lai, a tangmi caan nan ngeihmi te hi cu nuam te in hmang uh, vulei i an peekmi hna nuamhnak si lo in Bawipa sin i arami nuamhnak tu in nan caan hi hmang uh” ti hna pah in Amah nih capo tete zong asaihpiak hna. Cun “Rapture a tlin tiang in nan sin ah ka um cang lai, tampi zong a duh ti lo” ati.

Hi kong he pehtlai in thil a um mi vialte hi biatak te in tawlrel le buaipi asi cang lai caah kan umnak cio in biatak te in mitthlirh le rak cuanh khianh tu izuam hna usih law akarlak ah Pathian bia he pehltai in hal kan duhmi, hrilhfiah kan duhmi tampi zong Amah Bawizisuh sin in Direct Answer bak hmuh khawh asi ti hi ttha te in rak thei cio hna usih. Caan karlak ah biahalnak nan duhmi poh rak ttial ulaw, Amah arak iphuan lio i rak ka hal dih uh ati tik ah hal dih ding asi te lai. Zahaan zong ah an fapa pakhat sin ah atimi cu “Ziah,.. hal ding tampi ka ngei, ka halte lai na ti mi vialte kha tah, na ka hal ne lo, hihnu cu ca in rak ittial dih cang law cun rak ka halte..” ati. Bible lak ah hin zeidah na duhbik ti ah a hal i “Matthew” hi ka duhbik e ati. Theih nan duhmi pohpoh rak ka hal uh ti in caan tampi a peek hna, asinain an khuaruah a har khim i biahalding an thei lo. Apuanpar tete lawngte kan hal i ningzak lengmang in bia akan leh e an ti. Vulei harsatnak nan timi kan dawt hna caah nan tonmi asi. Atu ah nan duhmi hi in pe hna ning law nan ka philh ko lai, cu caah caan tampi ataang ti lo, hi caan chung hicu zeidang ah buai ti lo in kan chimhmi hna ning tu hin nun khawh izuam cang ko uh ti in biaza acah hna.

Tuzaang zong hi rak rat rih ding in timhlamhnak ngeih asi i biahalding tu rak irin cikcek a hau an ti. State dang le khuadang ummi zong nih caan karlak ah van tenhta i Bawipa bia rak ngaih ding hi siaherh ngaingai kan si hna.

Neknawi tampi ttial ding a um na in caan ngeih lo par ah asi, cun cauk in abiapi deuhmi an chuah cang ko lai caah carel tu ca i thazang van i laak khawh ding ti i ruahkhawh mi vial kan rak icom chung bia asi.

Bawipa pennak kau chin lengmang ko seh. Amen.