Bible Verses revealed to Children in Myanmar (Tachileit)

Genesis 6 : 17

¹⁷A nungmi thil vialte hrawhnak ding caah vawlei cungah buanchukcho ka tlunter lai. Vawlei cung i a ummi thil vialte an thi dih lai,

Ecclesiastes 8 : 13

¹³Sihmanhsehlaw miṭhalo mi hna caah cun a ṭha dih ko lai lo, an nunnak cu thladem bantukin a liam zau ding an si i Pathian an ṭih lo caah an no tein an thi lai,” an ti.

Matthew 24: 42- 44

²Cucaah nan Bawipa a rat lai ni nan hngalh lo caah ralring tein um ko u. ⁴³Hihi philh hlah u: Inn ngeitu nih mifir a rat lai caan kha hngal seh law, hngilh lo tein a rak um hnga i mifir kha a inn chungah a luhter hnga lo. *24:43-44: Luk 12:39-40 ⁴⁴Cu ruangah cun nannih zong timh cia tein nan um zungzal awk a si, zeicahtiah Mi Fapa cu nan i rin lo caan ah khin a ra ko lai.

Matthew 24: 37- 40

³⁷Mi Fapa a rat cu Noah chan i thil umtuning bantuk kha a si lai. *24:37: Gen 6:5-8 ³⁸Tilian a tlun hlan, Noah lawng chung i a luh ni tiang kha, an ei an ding an i ṭhi an i um i ³⁹tilian a hung tlun taktak i a fenh dih hna hlantiang kha cu, zeihmanh an hngal lo. Mi fapa a rat tikah cun cu bantuk cun a si lai. *24:39: Gen 7:6-24 ⁴⁰Cu caan ah cun mi pahnih lo ah rian a ṭuanmi hna lakah pakhat cu kalpi a si lai i pakhat cu nganhta a si lai.

Matthew 25: 1

¹“Cun Vancung Pennak cu hi bantuk hi a si lai, voi khat cu ngaknu pahra an um i nupi ṭhi tlangval kha don awkah an meiinn cio he an i thawh.

Matthew 25: 21

²¹A bawipa nih cun, ‘Sal ṭha, zumhawktlak sal, na tuahmi cu a ṭha ngaingai. Tangka tlawmte na lehthalnak ah zumhawktlak na si, cucaah tangka tampi tawngthamtu ah kan chiah lai. Ra lut law ka lunglawmhnak hi i hrawm ve,’ tiah a ti.

Mark 8: 36-37

³⁶Mi pakhatkhat nih vawlei hi a ning piin co seh law, a nunnak sung ṭung seh law, zeital a miak hnga maw? Miak hlah! ³⁷Cun a nunnak cu zeital in a caw ṭhan kho hnga maw? Caw ṭhan kho hlah.

Mark 13: 19

¹⁹Zeicahtiah hi a tlung dingmi harnak hi Pathian nih vawlei a ser hramthawk in atu tiangah a um bal lomi thil, ṭih a nung bikmi harnak a si lai. Hmailei zongah cu bantuk cu a um ti lai lo.

Luke 13 : 22-30

²²Jesuh cu Jerusalem i a kalpah ah khan khua kha a pal duahmah hna i a cawnpiak pah lengmang hna. ²³Mi a cheukhat nih bia an hal i, “Bawipa, mi hi tlawmte lawng maw khamh an si lai?” an ti. ²⁴Jesuh nih a leh hna i, “Kutka bi chung khan lanh i zuam ko u, zeicahtiah hihi kan chimh hna: mi tampi cu luh an i zuam lai nain an lut kho lai lo.

²⁵“Inn ngeitu cu a tho lai i kutka cu a khar lai; cun nannih cu a leng i nan dir i kutka khar cu nan kingh i, ‘Bawipa, innka kan hunh tuah,’ nan ti tikah, ‘Khuazei in dah nan rat kha ka hngal lo,’ tiah an leh hna lai. ²⁶Cun nannih nih nan leh ve lai i, ‘Na sinah pei rawl kan ei i ti kan din kha, kan khua ah pei na kan cawnpiak kha,’ nan ti lai. ²⁷Anih nih an thawh hna lai i, ‘Khuazei in nan rat kan hngal lo. Nannih ṭhat lonak a tuahmi vialte hna, ka sinin kal ko u,’ a ti hna lai. *13:27: Slm 6:8 ²⁸Nannih vial cu lengah nan um lai i Abraham le Isak le Jakob le profet vialte hna cu Pathian Pennak chungah khan nan hmuh hna lai, cu tikah nan ṭap len lai i nan hacang nan i rial sek te lai. *13:28: Mat 22:13; 25:30 *13:28-29: Mat 8:11-12 ²⁹Nichuah, nitlak, chaklei, thlanglei, in mi kha an ra lai i Pathian Pennak cabuai ah khan an ṭhu lai. ³⁰Cu tikah cun atu i a hmanung bik hi a hmasa bik an si lai i atu i a hmasa bik hi a hmanung bik an si lai,” tiah a ti. *

Luke 17: 26-30

²⁶Noah chan ah a rak si bantuk khan Mi Fapa chan zongah a si ve lai. *17:26: Gen 6:5-8 ²⁷Noah nih lawng chungah a luh i buanchukcho kha a tlun i an thih dih ni tiang hrimhrim kha, an ei an ding an i ṭhi an i um ko. *17:27: Gen 6:5-8 ²⁸Lot chan i a rak si bantuk khan a si ve lai. An ei, an ding, an i caw an i zuarh, thlaici an cing, inn an sa. *17:28-29: Gen 18:20—19:25 ²⁹Lot cu Sodom in a chuah ni ah khan mei le kat cu vancung in a rung sur i a thah dih hna. ³⁰Cuticun Mi Fapa a langh ni ah cun a si ve lai.

1 Peter 5: 8

⁸Fimhring tein um u, ralring tein um u! Nan ral Khuachia cu, seh awk kawl ah, chiandeih bangin a vak cuahmah ko.

John 14 : 1-3

¹Khuaruahhar lungrethei in um hlah u. Pathian kha zum u, keimah zong kha ka zum ve u. ²Ka Pa inn chungah khaan tampi a um ko i cuka i nan caah hmun va timh awkah ka rak kal lai. Cu bantukin si hlah seh law hitihin kan chim hna hnga lo. ³Cun ka va kal lai i nan ca i ka va timh dih hnuah ka ra kir ṭhan lai i ka sinah kan lak hna lai, cun ka umnak ah nannih zong nan um ve lai.

Rome 3: 1-10

¹A si ahcun Judah mi nih cun Jentail mi hna nakin ṭhatnak zeital an hmu deuh kun maw? Cuarpartan cu santlaihnak zeital a ngei kun maw? ²A phunphun in tampi a um ko! Cu hna lak i a hmasa bik cu, Pathian nih a bia Judah mi a kenter hna kha a si. ³Asinain a cheu kha zumh awk tlak lo an rak si si kaw, zeitindah a si kun lai? Cu ruangah cun Pathian zong cu zumh awk tlak lo a si ve lai tinak a si maw? ⁴Si hrimhrim hlah. Minung hi kan dihlak in lihchim si hmanh u sih law Pathian cu zumh awk tlak a si ṭhiamṭhiam ko. Cathiang nih,

• “Bia na chim tikah na chimmi cu
• ahmaan ti kha a lang lai i
• tazacuai na si tikah na bia cu
• na tei lai,”
  tiah a ti bang khan a si. *3:4: Slm 51:4

⁵Ahmaan lomi thil kan tuahmi nih ahmaanmi thil Pathian nih a tuahnak fiang chinchin in a langhter ah tah, zeitin? Zeidah kan chim khawh lai? Pathian nih kannih cu dan a kan tat tikah a palh a si maw? (Minung biachim in hei chim ko ning law.) ⁶Si hrimhrim hlah. Pathian cu a din lo ahcun, zeitindah vawlei cu bia a ceih khawh lai?

⁷Asinain ka lihchimnak nih Pathian biatak cu fiang chinchin in a langhternak thawngin Pathian cu sunparnak ngan deuh a pek ahcun, zeicahdah kei cu misual na si tiah sualphawt ka si kun? ⁸“Ṭhatnak a chuah nakhnga ṭhat lonak kha tuah u sih,” tiah zeicaah kan ti ko kun lo? Cu hrimhrim cu a chimmi a si, tiin mi cheukhat nih an ka thangchiat. Cu bantuk mi pawl cu sualphawt awk tlak an si bantukin sualphawt an si ko lai.

⁹A si ahcun, kannih Judah mi hi tah, Jentail mi hna nakin kan dirhmun a ṭha deuh hlei kun maw? Ṭha deuh hlei nemmam hlah. Ka langhter cang bang khan Judah mi he Jentail mi he kan dihlak in sualnak ṭhawnnak tang i a ummi kan si.

¹⁰Cathiang nih,

“A dingmi ahohmanh an um lo,

1 Thesalonian 4: 16- 17

¹⁶Au thawng, vancungmi bawi bik au thawng, Pathian muko aw thawng cu a hung thang lai i Bawipa hrimhrim cu vancung khin a rung ṭum lai. Khrih zumh buin a rak thimi kha nunnak ah thawhter an si hmasa lai i ¹⁷cu caan i a nung rihmi kannih pawl cu khuadawm lakah khin Bawipa cu van i hung ton awkah pumh kan si dih lai. Cun Bawipa sinah cun zungzal in kan um lai.

1 Thesalonians 5 : 20

phungchim kha zeirello in um hlah u.

1 Timothy 2: 4

^3-4Mi vialte nih khamhnak hmu hna seh ti le biatak kha hngal hna seh ti a duhmi Pathian kan Khamhtu nih, hi thil ṭha hi a duhmi a si.

Malakhi 4: 1-6

¹A vaam huammammi somei bantukin cu ni cu a ra; miporhlaw vialte hna le ṭhat lonak a tuahmi vialte hna cu favai an si lai, cun cu ni cu a rat tikah, cu ni nih cun annih cu a alhter hna lai i an hram le an nge zong tang loin a kangh dih hna lai, tiah ralkapbu Bawipa nih a ti. ²Sihmanhsehlaw ka min a ṭihzahmi nannih caah cun, dinnak ni, a thla ah damnak a hun i zuanpimi ni cu a hung chuak lai i kawm chungin chuahmi cawfano hna bantukin nan luat lai i nan i lawm lai. ³Ka cawlcangh ni ah cun nannih nih miṭhalo kha nan ke tangah nan lamh beh hna lai i annih cu nan keza tang i a ummi vutcam kha an si lai, tiah ralkapbu Bawipa nih a ti.

⁴Ka sal Moses phungbia kha philh hlah u, Israel mi vialte na va pek hna lai, tiah Horeb tlang i ka timi nawlbia le cawnpiaknak kha philh hna hlah u, ⁵A lian a ngan i ṭih a nungmi ni, Bawipa ni cu a phak hlanah, nan sinah profet Elijah kha ka rak thlah lai. *4:5: Mat 11:14; 17:10-13; Mar 9:11-13; Luk 1:17; Jhn 1:21 ⁶Ram cu chiatserh awkah ka rat sual nakhnga lo, amah nih cun pale hna cu an fale hna he a remter hna lai i an fale hna cu an pale hna he a remter hna lai.

Malakhi 4: 5

⁵A lian a ngan i ṭih a nungmi ni, Bawipa ni cu a phak hlanah, nan sinah profet Elijah kha ka rak thlah lai.

Jeremiah 25: 30-38

³⁰“Ka chimmi bia vialte cu

• na thanh hna lai i
• ‘ Bawipa cu cung sangpi khin a rung
• au lai,
• A umnak hmunthiang khin khuarit in
• a rung ri lai.
• Amah tuurun chungah khan fak piin
• a huk lai i
• Mitsur thei a nengtu hna an au
• thawng bantukin
• vawleicung mi vialte cungah khan
• a au lai.
• 
  

³¹A au thawng cu vanhramdeng tiang

• a thang lai,
• zeicahtiah Bawipa cu miphun
• vialte cungah bia a ngei i
• minung vialte kha taza a cuai hna lai i
• a sualmi cu vainam in an thi lai,
• tiah na chimh hna lai,’
• tiah Bawipa nih a ti.
• 
  

³²Zohhmanh, rawhralnak cu miphun

• pakhat sinin pakhat sinah a karh
• chin lengmang i thlichia cu
• vanhramdeng in a tho lio,
• tiah Bawipa nih a ti.

³³Cun cu ni ah cun Bawipa nih a thahmi hna cu vawlei khattelei kam in khattelei kam tiang hmunthur bantukin an ril liangluang ko lai. Ahohmanh nih an ṭah hna lai lo, a pumh zong an pum hna lai lo, a vui zong an vui hna lai lo.

• 
  

³⁴Maw tuukhal hna, ṭap u law ai u,

• Tuurun bawi hna, vutcam lakah
• i lawng u.
• Atu cu thahnak hmun i kal kha
• nan chel a si cang i
• tuukawng ṭha bantukin nan tlu lai.
• 
  

³⁵Tuukhal hna caah zamnak hmun

• khuazei hmanh ah a um lai lo.
• Tuurun bawi hna caah luatnak lam
• zeihmanh a um lai lo.
• 
  

³⁶Tuukhal hna ai thawng cu

• ngai hmanh,
• Tuurun bawi hna kiao thawng cu
• thei hmanh,
• Zeicahtiah an tlonnak ram cu Bawipa
• nih a hrawh lio i,
• 
  

³⁷A thinhun ruangah dai tein a ummi

• an innlo hna cu a rawk dih.
• 
  

³⁸Chiandeih a kua a chuahtakmi bantuk

• khan an zam,
• Zeicahtiah an ram cu pakpalawng ah
• a cang cang,
• Vainam le thinhunnak nih
• pakpalawng ah a canter dih cang.

Jeremiah 23: 19

¹⁹A kangh in mi a kangmi thli, Bawipa

• sinin a chuakmi khi zohhmanh,
• Ṭotho phuchim a si khi!
• Miṭhalo hna lung chungah
• aa zi len ko.

Isaiah 24 : 1-23

¹ Bawipa nih vawlei cu a hrawh cikcek lai i a cungah zeihmanh um lo in a lawng dih lai. A bingtalet in a chiah lai i a cung i a ummi vialte kha a ṭhek dih hna lai. ²Ahopaoh nih cu bantuk thil cu ton a si ko lai — tlangbawi nih si hna seh, zapi nih si hna seh, sal nih si hna seh, bawi nih si hna seh, thil cawtu nih si hna seh, a zuartu nih si hna seh, tangka mi a cawihtu nih si hna seh, tangka mi sinin a cawimi nih si hna seh, mirum si hna seh, misifak si hna seh, cu bantuk cu an ton dih ko lai. ³Vawlei cu a kek a kuai dih lai i a rawk dih lai. Cu bia cu Bawipa nih a chimmi a si i a chim bangin a si ko lai.

⁴Vawlei cu a ro i a car; vawlei cu a uai in a uai; van zong vawlei zong an rop dih. ⁵Mi nih Pathian nawlbia kha an buar caah vawlei cu an thurter i zungzal hmun dingin a sermi biakamnak kha an hrawh caah an hnawmhter. ⁶Cucaah Pathian nih vawlei cu hrawh awkah khan vawlei cu chiat a serh, vawleicung mi nih an sual man kha an in. A tangmi cu an tlawm chin lengmang. ⁷Mitsur ruang kha an car i mitsur zu kha a tlawm. A rak i lawm tawnmi kha atu cu an ngaih a chia dih cang i ⁸an i lawmhnak hla dawh le tingtang tum thawng le khuang thawng kha a dai cang. ⁹Hlasak pah i mitsur zu din kha a um ti lo, ahohmanh nih mitsur zu kha a thaw an ti ti lo. ¹⁰Khuapi chungah zeizong vialte hnahnawk in a um dih, inn kha khar an si dih i mi kha lengah chuah an si dih. ¹¹Zalam ah khan mi cu an dir i, zu kan duh, tiah an au; lawmhnak cu a lo cang, ram chungin hlonh a si cang. ¹²Khuapi cu a rawk i a kutka cu an baoh dih hna. ¹³Mah hihi vawlei cung miphun dihlak cung i a tlung dingmi thil cu a si. Zei he dah aa lawh lai ti ahcun, rawl ṭuan a dih tik i oliv thei vialte oliv nge in an ṭhilh dih hna hnu le mitsur ruang in mitsur thei vialte an lawh dih hna caan he khin aa lo lai.

¹⁴A tangmi cu lunglawm in hla an sa lai. Nitlaklei i a ummi nih Pathian a lianhngannak kong kha an chim lai i ¹⁵nichuahlei i a ummi nih an thangṭhat lai. Rili kam i a ummi hna nih Bawipa Israel Pathian cu an thangṭhat lai. ¹⁶Vawlei cung a hlatnak bik ram i a ummi hna sinin a dingmi miphun, Israel miphun thangṭhatnak hla kha kan theih lai.

Sihmanhsehlaw kei ka caah cun ruahchan awk a um lo. Ka derchin lengmang ko. Mirawihmang mi pawl kha mi rawi an hmang ṭhiamṭhiam ko i an mirawinak kha a chia chin lengmang a panh. ¹⁷Vawleicung mi hna! Thil ṭihnung le khor le rap nih an in bawh ko hna. ¹⁸Thil ṭihnung kha zamtak aa zuammi cu khor chungah an tla lai, khor chungin a luatmi cu rap ah an i foih lai. Van in ruah bawnbok ngaw in a sur lai i vawlei hram cu aa hnin lai. ¹⁹Vawlei cu a kak a kuai lai i aa cheu lai. ²⁰Vawlei cu zuri bangin a sawn lai i ṭotho lak thlam bangin aa hnin lai. Vawlei cu a sualnak nih rit piin a nenh; a tlu lai i zeitikhmanh ah a tho ṭhan ti lai lo.

²¹ Bawipa nih cunglei ṭhawnnak le vawlei cung uktu hna kha dan a tat hna lai ni a phan lai. ²²Pathian nih siangpahrang hna kha thongtla hna bangin khor chungah i tet tein a erh hna lai. An dantatnak ni a phak hlantiang thong ah cun a khumh hna lai. ²³Ralkapbu Bawipa cu siangpahrang a si lai caah thlapa cu a mui lai i ni cu a tlang lai lo. Jerusalem khua cu Zion Tlang in a uk lai i a sunparnak cu an upa hna nih khan an hmuh lai.

Revelation 12 : 12

¹²Cucaah cun nannih van hna le khika i a ummi vialte hna, i lawm tuah u. Sihmanhsehlaw vawlei le rili caah cun ṭihnung a va si hringhran dah! Zeicahtiah Khuachia cu nan sinah a rung ṭum cang i cu pinah caan tawite lawnglawng ka ngei ti kha a hngalh fawn caah a thin a linh in a lin ko,” tiah a ti.

Revelation 3 : 2

²Cucaah cun i hlau law na ngeih rihmi kha a thih taktak hlanah thazang thar la tuah. Zeicahtiah na tuahmi thil kha Pathian mit hmuh ah a tlingmi an si rih lo ti kha ka hmuh.

Revelation 3 : 20

²⁰Ngaihmanh! innka ah ka dir i ka kingh. Ahohmanh an si ah, ka aw a thei i innka a ka hunhmi cu, a inn chungah cun ka lut lai i a sinah rawl ka dum lai i amah zong ka sinah a dum ve lai.

Revelation 10- 12

¹⁰Cun hitihin a ka ti, “Hi cauk chung i aa ṭialmi profet chimchung bia hi a thli in i chiah ko hlah. Zeitintiah hi thil vialte cu a tlin lainak caan a nai cang. ¹¹Miṭhalo cu ṭhat lonak kha tuah lengmang ko seh, fihnung a simi cu fihnung kha tuah lengmang ko seh, miṭha a simi cu ṭhatnak kha tuah lengmang ko seh, mithiang a simi cu thiannak kha tuah lengmang ko seh,” a ti. *22:11: Dan 12:10

¹²Jesuh nih cun, “Ngaihmanh, ka ra zau lai. Mi kip an rianṭuanning cio ah pek awkah ka laksawng cu ka rak i put lai.

Revelation 22 : 17

¹⁷Thlarau le va ngei laimi ngaknu nih khan, “Ra u,” an ti.

Hi bia a theimi paoh nih khan, “Ra u,” ti ve hna seh.

Ti a halmi paoh cu ra u, nunnak ti hi a duhmi paoh nih manloin i lak u. *

Revelation 22 : 4-5

⁴Annih nih a hmai an hmuh lai i a min cu an cal ah aa ṭial lai. ⁵Zan a um ti lai lo i meiinn siseh, ni ceunak siseh, an herh ti lai lo, zeicahtiah Bawipa Pathian cu an ceunak a si lai i annih cu siangpahrang bantukin uktu zungzal in zungzal tiang an si lai. *

Revelation 21: 4-5

⁴An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang,” a ti. *21:4: Isa 25:8; 35:10; 65:19

⁵Cun bawiṭhutdan i a ṭhumi nih cun, “Atu cu thil vialte kha a thar in ka ser dih cang hna,” a ti. A ka thawh i, “Hi bia hi ṭial hna, zeicahtiah ahmaanmi le zumhawktlak a simi bia an si,” a ti.

Revelation 21: 27

²⁷Sihmanhsehlaw a thurhnawmmi cu khi khua chungah ahohmanh an lut kho lai lo; ningzah awk thil a tuahmi hna le lih a chimmi hna zong ahohmanh an lut kho lai lo. Tuufa nunnak cauk chung i an min aa ṭialmi lawnglawng cu khuapi chungah cun an lut kho lai. *

Note : (Shanram Tachileih i a ummi Lahu miphun hngakchia kum 6-8 kar hrawnghrang tete sin i Pathian nih biaphuan chim afialmi hna lak i Bible caang byheart i an ivahpi mi ansi)